கல்வெட்டு

காதலி Wanted

2008-06-04T18:00:00.003+05:00

அவசர அவசரமாக
எனக்கொரு
காதலி தேவைப்படுகிறது.

பாதியாய் மறைக்கப்பட்ட
மார்பகங்களும்
பாதிக்கும் குறைவாய்
மறைக்கப்பட்ட உடல்களும்
கலவரப்படுத்திப் போகிறது
என் ஹார்மோன்களை

சில முத்தங்களும்
சில சத்தங்களும்
தனித்திருப்பதற்கான
தண்டனையாய் படுகிறது

online'ல் பார்க்கும் ஒவ்வொரு
நொடியும் பேசத்துடிக்கிறது
மனது
பேசாமல் விட்ட விசயங்களும்
பேசுவதற்காய் சேர்த்து வைத்தவைகளும்
அழுத்திப்போகிறது மனதை

மீறி
பேசியவைகள் எல்லாம்
சச்சரவுகளில் முடிந்தது
பேசாதவைகள் எல்லாம்
கற்பனைகள் என ஒளிந்து
கொண்டது

அவ்வப்போது எழுதியாகிவிட்டது
உனக்கான காதலையும்
எனக்கான வலிகளையும்

போதும் வா
கிளம்பி வா
வந்து தணித்துப் போ எல்லாவற்றையும்
என் காதலியாய்

பின்குறிப்பு:
தேர்வுகள் இருப்பதால் june23'க்கு அப்புறம் கிளம்பி வரவும்

- பிரேம்

மொக்கை

2007-07-30T14:30:00.000+05:00

அவசர சிகிச்சைப் பிரிவில் அனுமதித்திருக்கிறேன் அவனை...வெகு நாட்களாக
எழுதவில்லை..காயப்படவில்லை...கண்ணீர் சுரப்பைகள் கூட வற்றிவிட்டதாகவே
உணர்கிறேன்..கடைசியாய் அனுமதிக்கப்படுமுன் அவன் முனங்கியவைகளில் சிலவற்றை பதிவு செய்திருக்கிறேன்.ஞானசேகர் மொழியில் சொல்வதென்றால் "மொக்கை" என்றாலும் வேறு வழியில்லாமல் பதிவு செய்கிறேன்.இதுவே அவனுடைய கடைசியாய் இல்லாமல் இருக்க வேண்டும் என்றே விரும்புகிறேன்.மீண்டுவிடுவான் என்ற நம்பிக்கையில்.....

**************************
யார் யாருக்கெல்லாமோ
உனை பிடித்திருப்பதாய்
சொல்லிக் கொண்டிருக்கிறாய்

உனக்கு பிடித்திருக்கிறதா
எனக் கேட்பதாகவே படுகிறது எனக்கு.
****************************
இன்னும் எத்தனை வருடங்கள் தான்
பார்க்காமல் இருப்பது

ஒருமுறைதான் வந்து
பார்த்துவிட்டு போயேன்
பத்திரமாய் இருக்கிறதா
உன் நினைவுகள் என்று.
***************************************************

பைக்கில்
கொஞ்சம் நெருங்கி தான்
உட்காரேன்
பார்த்துத்தான் விடுவோம்
எவ்வளவு தான் துளைக்கிறதென்று

*****************************************

எழுதாத கவிதை

2006-10-16T12:07:00.000+05:00

கிறுக்கலாய் படுகிறது
எல்லாமே
தோளில் சாய்ந்தபடி
நெஞ்சில் நீ எழுதிய
கவிதைக்கு பிறகு
---------------------------
யாரையோ தேடுவதாய்
தேடிப் பிடிக்கின்றன உன் விழிகள்
நான் பார்ப்பதை
---------------------------
உன் பாரங்களோடு
என் மீது சாய்கிறாய்
மிதக்கிறேன் நான்
---------------------------
பார்க்காத தருணத்தில்
பார்த்துவிட படபடக்கிறது
உன் கண்கள்

உன் பார்வையை
கவ்விவிட காத்திருக்கிறது
என் கண்கள்

இரண்டிற்குமாய்
ஏங்கித் துடிக்கிறது என் இதயம்
--------------------------
யாருக்கும் தெரியாமல்
சந்தித்துக் கொண்ட நம் பார்வைகளை
காட்டிக்கொடுக்கிறது
உன் வெட்கம்
-------------------------

அரசியல்

2006-09-19T12:09:00.000+05:00

அடியே இந்திரா
நம்ம பொழப்பே நாத்தம் புடிச்ச
பொழப்பா இருக்கு
இதுல இவுக கூத்தக் கேட்டியா!?

சாதிக்க பொறந்தவுக
சாதியவச்சி பிரிச்சிடாதிகன்றாக
அப்படியே
சாக்கடைய அள்ள
அவுக சாதிக்காரவிய எப்ப வாராகன்னு
கேட்டு சொல்லலாமுல்ல

கால் வயித்து கஞ்சிக்கு
வழியில்லனாலும்
மந்திரம் சொல்லி சம்மதிப்பாக
மலம் அள்ள சம்மதிப்பானுவலா

அடியே நீ எதாவது ஆக்கினியா
அரிச்சி அரிச்சி பாத்தாலும்
ஒன்னும் அகப்படலியடி
முந்தா நேத்து வச்ச கஞ்சியில
பருக்ககூட மிஞ்சலயடி

வருசத்துல பாதி நாலு
பட்டினியா கெடந்தாலும்
கேக்க ஒரு நாதியில்ல
ஏதோ
மூணு வேள சாப்பிடலியாம்
மிகப்பெரிய போராட்டமுன்னு
போஸ் கொடுக்குறானுக

எடுபட்ட பயலுக
இத வேற போட்டு போட்டு
காட்டுறானுக
படப்பொட்டியில

இதெல்லாம் காணாதுன்னா
தலித் எழுத்தாளர்ன்னு சொல்றான்
என்னயும் சேத்துக்கன்றானுங்க
அதுசரி
எந்த கக்கூச
எப்ப கழுவ வர்றானுங்கன்னு
எழுதினா நல்லாயிருக்கும்

சரி நமக்கெதுக்கு இதெல்லாம்
வா நம்ம
நம்ம பொழப்ப பாப்போம்

2006-06-26T17:12:00.000+05:00

கவலைகள் செத்துப்போன அன்று
யார் யாரோ
அழுவதாக கற்பனைசெய்கிறேன்
ஏமாற்றிவிடாதீர்கள்
வாடகைக்காவது பிடித்துவாருங்கள்
அப்படியே
உங்களுக்காக சிரிப்பதற்கும்.

தோழி...

2006-05-30T22:45:00.000+05:00

* என் மனதில்
பதட்டத்தில் நிழல் படிந்திருந்த
ஒரு
அழகான தினத்தில்
நீ அறிமுகப்படுத்தப்பட்டாய்.

* பார்க்காமல் விட்டுவிட்டேன்
ஒருவேளை நடந்திருக்கலாம்
மனதை வருடும் மழையோ
இல்லை
வானில் நட்சத்திரமோ
எதோவொன்று உணர்த்திப்போயிருக்கலாம்
எனக்கொரு தோழி கிடைக்கப்போவதை

* என் முகம் சத்தமாகவும்
வார்த்தைகள் ரகசியமாகவும்
சொல்லிப் போகின்றன
என் வலிகளை
உன்னிடம்

* வேதனையின் போது.
சாரலில் எழும்
மண்வாசனை போல்
இதமாய் இருக்கிறது
உன்
நட்பின் வார்த்தைகள்

* என் உள்ளங்கையில்
விழுந்த கண்ணீரில்
தெரிகிறது
உன் நட்பின்
பிம்பம்..

* சந்தோசமாய்
உன் விரல் பிடித்து
சிறுகுழந்தை போல
விளையாடிக்கொண்டே நடக்கிறது
மனது
அருகருகே
நடந்துகொண்டிருக்கிறோம் நாம்

if i leave will u miss me??

* இல்லை என்றால்
நம்பிவிடவும் ஆமாம்
என்றால்
ஒத்துக்கொள்ளவுமா போகிறாய்...

ஆனால் தயவு செய்து
பிரியும் போது
கொஞ்சம்
வலிக்காமல் தான்
பிரிந்து போயேன்
பயமாய் இருக்கிறது...

- பிரேம்

ஆசையின் ஏக்கம்

2006-05-11T13:42:00.000+05:00

அன்புள்ள ..... ,
ஞாபகமிருக்குமென்றே
நினைக்கிறேன்
என் பெயர் உனக்கு..

வழக்கமான தொடக்கம்தான்
இருந்தும் அறிந்தே இருக்கிறேன்
சத்தமாய் உச்சரிக்க சத்தமில்லாமல்
ஏங்கும் உன் மனதை

மழைபெய்து ஓய்ந்த
மாலைநேர தேநீர் போல
இனம்புரியாத இதமாக இருக்கிறது
உன் நினைவுகள்

இருபத்தி இரண்டு வருடங்கள்.

பேருந்து பயணம் போல
கடந்துவிட்டது வாழ்க்கை
இதில் நான்கு வருடங்கள்
உன் தோள் சாய்ந்து...

தெரிந்தும் தெரியாமலும்
தோள்வாங்க நினைத்து
விழுந்து காயப்படுகிறேன்
இப்போதெல்லாம்

காயங்களை நினைத்து
நானே சிரித்துக் கொள்கிறேன்
எல்லோருடன் சேர்ந்து...

ஆனாலும்
இன்னும் நினைவிருக்கிறது
மெதுவாய் புன்னகைத்து
தலையை திருப்பி
நீ
கண்களை துடைத்துக் கொண்டதை

அது எனக்காக
என்று சந்தோசமாய்
இருந்த தருணத்தில் தான்
நடுத்தெருவில்
எனை கதறி அழவிட்டு
கைப்பிடித்து போகப்பட்டாய்

இன்றும்
உதடுகளை புன்னகைக்க விட்டு விட்டு
அழுது புரள்கிறது
மனது

ஏக்கத்தோடு காத்திருக்கிறேன்
உன் அரவணைப்பின்
கதகதப்பில் கேட்கப்படும்
என் வேதனையின் முனங்களுக்காய்..
என் மூச்சுக்காற்று
முனங்கும் முன் வந்துவிடுவாய்
என்றே நினைக்கிறேன்.

இன்றும் அன்புடன்
பிரேம்

சுனாமி சிதறல்கள்

2006-05-05T14:53:00.000+05:00

புயலுக்கு பின் அமைதி!!!
கடலுக்கு மட்டும்...!!

------------------------------

இலக்கு நிச்சயமில்லாத பேருந்து,
குளோரின் போடப்பட்ட சாலைகள்,
பாலத்தின் மேல் படகு
முகமிழந்த நாகை துறைமுகம்
பூட்டப்பட்ட வீடுகள்
மாஸ்க் அணிந்த மனிதர்கள்,
தடுப்பூசி வரிசைகள்,
பீடி கேட்கும் பெரியவர்,
நாற்றமடிக்கும் உடல்கள்
இரத்தம் வழியக் காத்திருக்கும் நாய்
சில புதிய மனநல நோயாளிகள்
தமிழ் தெரியாதவர்களின் ஹெலிகாப்டர் விசாரிப்புகள்
தீண்டத்தகாதவளான கடலன்னை
சோற்றுத் தட்டாகிய ரோடுகள்
நகைக்காக ஊனப்படுத்தப்பட்ட சடலங்கள்
கிறிஸ்தவர்களின் புனித நகரத்தில்
இந்துக்களின் நிவாரண வண்டி
விச ஊசி கேட்ட சிலபேர்
அழிவின் ஆழம் தெரியாமல் சிரித்த மழலைகள்
தரை மட்டுமே எஞ்சிய வீடுகள்
ஒரே குழியில் 90 பிணங்கள்

போதும் போதும்
இனிமேலும் கேட்காதீர்கள்
நாங்கள் பார்த்தவைகளை

----------------------------------
அழிந்து போன டினோசர்கள்,
தப்பிப் பிழைத்த கோமோசெப்பியன்கள்,
கடலில் கலக்காத யமுனை நதி,
கேட்பாரற்ற பெர்முடாஸ் முக்கோணம்,
நாகப்பாம்பின் தப்பிப் பிழைத்த ஒரு குட்டி,
நாகசாகியில் கரப்பான் பூச்சிகள்,
இன்று கடற்கரை தேரைகள்!!
என்று முடியும்
இயற்கையின்
இந்த ஓரவஞ்சனை?

---------------------------

கடல் துச்சாதனன்
துகிலுறிந்ததால்
உயிரை விட்டாள்
இந்த கலியுக திரெளபதி?

-----------------------------

ஒரு கைக்குழந்தை
கைகளில்லாமல் ஒரு 16 வயது பையன்
சற்றே நிர்வாணம் மறைக்கப்பட்ட
ஒரு ஆணும் பெண்ணும்
இவர்களைத் தாங்கிய
சில சவுக்குக் குச்சிகள்
இன்னும் சில கையுறைகளும்
கந்தல் துணிகளும்
"தீ மூட்டினார்" ஒரு "பாதிரியார்"!!
எங்கே போயின
இந்த சாதியும் மதமும்!?
இறைவனிடம் கேட்பேன்
எனக்கும்
இப்படியொரு தகனம்

-------------------------------
வயித்த நனைக்க
காவிரித் தண்ணி கேட்டோம்
வங்கத் தண்ணி கொடுத்து
நொறையீரல் நெறைத்தாய்......
-----------------------------

சாவுக்குத் தப்பிச்சதால
சாவடில வந்துநிக்கிறோம்
சாப்பட்டுக்கு வழியில்ல
சாவே பரவாயில்ல...

-----------------------------

தாலிய கழட்டி வெச்சி வேண்டிக்கிட்டா
கட்டினவன் வந்துபுட்டேன்
கட்டினவள காணலியே
வாக்கரிசிக்கு வழியிருந்தா
உனக்கு சொல்லிவிடுறேன்
பொணத்தயாவது அனுப்பி வை
வாக்கரிசி நான் போட...!!

---------------------------------

யார் இவர்களுக்குப்
போர்வை கொடுக்க மாட்டேன் என்றது
இப்படி
மண்ணைப் போர்த்தித் தூங்குகிறார்கள்.....

-----------------------

முத்தெடுக்க
கடலுக்குள்ள குதிச்சிருக்கோம்!
இப்ப
எங்க முத்த
கடலுக்குள்ள தொலச்சினிக்கோம்!!
எந்தக்கரையில ஒதுங்கும்னு தெரியலயே
அறடி நெலமாவது கிடைக்குமா புரியலியே!!??

---------------------------

வறுமைக் கோட்டை அழிக்க முடியாமல்
கோட்டிற்கு கீழுள்ளவர்களை
அழித்துப் போனது கடல்!!!

-------------------------------

போகிகள் இனி எழுதலாம் "கல்வெட்டை கண்டுபிடிங்க"

2006-03-06T10:40:00.000+05:00

நிகழ்காலத்தை அடகுவைத்து
உன்னுடனான
கடந்தகாலத்தை மீட்டுக்கொண்டிருக்கிறேன்
நினைவுகளில்!!

திடிரென்று கேட்டதால்
குழம்பிவிட்டேன்
நில்
பார்த்துவிட்டுச் சொல்கிறேன்
என் பெயரை!!

உனைப் பார்த்ததும்
கண்ணில் தெரியும் காதல்
நீ பார்த்ததும்
ஓடி ஒழிந்து கொள்கிறது
மனதில்!!

உன்
கண்ணீர் துளிகள் விழுந்ததில்
சிதறியது
மனது!!

திருவிழாவில்
தொலைந்த குழந்தையாக
தேடி அலைகிறேன்
உன்னை
கடந்துவந்த பாதையில்!!

புதிதாய் வாங்கும்
பேனாக்கள்,
உன் பெயரை எழுதவே
கற்றுக்கொள்கின்றன
முதலில்
நான்
மறந்துவிட்டபோதிலும்

நிராகரிப்புக்கு பயந்து
தற்கொலை செய்துகொண்டது
அதனால் தான் என்னவோ
உனை சுற்றியே
அலைந்து கொண்டிருக்கிறது
காதல்

ஏனென்று கேட்காமல்
உயில் எழுதிவை
நான் கொண்டுவரும் தாளில்தான்
சிதை மூட்டவேண்டுமென்று
கொண்டுவருகிறேன்
உனக்கான கவிதைகளை

- பிரேம்

காணவில்லை

2006-02-03T11:31:00.000+05:00

hmmmm...காணவில்லை
என்ன செய்வது
எங்கு தேடியும் காணவில்லை,
உன் நினைவுகளின்
சாட்சிகள்

எங்கே போயின
எனக்கான உன் முகவரியும்
உனக்கான என் இதயவரியும்
சுமந்த குறிப்பேடுகள்

எல்லாம் தொலைந்துவிட்டது
உன் முகவரிகூட
இல்லாமல் நிற்கிறேன்.

பாவம்
அநாதையாக அலைகிறது
மனது

எனக்காக நீ எழுதிய
கடிதங்கள் எங்கே??
மனது வலித்த போதெல்லாம்
கண்கள் எழுதிப்பார்த்த
உன் கடிதங்கள்
எங்கே

எங்கே போனது
என் கண்ணீரின் சாட்சிகள்

"அதெல்லாம் எதுக்கு
இனி அதெல்லாம் வச்சி
என்ன பண்ணப்போற"

என்னவென்று பதில் சொல்வது
இல்லை!?
என்ன உணர்ச்சி காட்டுவது!!?

எரிக்கப்பட்டுவிட்டதாம்.
உன் சம்பந்தப்பட்ட எல்லாமே
எனைத் தவிர.

- பிரேம்

பனித்துளி

2005-12-19T14:17:00.000+05:00

மிகச்சிறந்த கவிதைகள்
எழுதப்படுவதில்லை
உணரப்படுகின்றன
உனைப்போல.
----------------------

தவிக்கிறது மனது
இலையின் நுனியில்
பனித்துளி
----------------------

உன் பார்வைகள்
குத்தி பார்க்கின்றன
என் காதல்
உணர்ச்சிகளை
---------------------
உன்
கண்களில் தெரிகிறது
என் வேதனையின் அளவு.
-------------------------
என்றோ உன்
கண்ணீர் துளிகள் நனைத்த
சட்டை
ஈரமாகவே இருக்கிறது
இன்றும்.
-------------------

சத்தமில்லாமல் வாசிக்கவும்

2005-12-15T18:41:00.000+05:00

தனிமை..
தனிமை..
கண்ணுக்கெட்டிய தூரம்வரை
யாருமில்லை

நான் யார்?
அவசியமில்லாமல் போகிறது
முதன்முதலாக

நூற்றாண்டுகளின்
ஏக்கத்தோடு காத்திருக்கிறேன்
இந்த மழைக்காக

அறிந்தோ அறியாமலோ
படிந்து போன
நூற்றாண்டுகளின் கரையை
கழுவதற்காக
காத்திருக்கிறேன்

எப்போது நிகழ்ந்திருக்கும்?
வெற்றிக்காண காரணம் என்ன?
இன்று வரை அறியமுடியவில்லை
பண்பாட்டின் மீதான
படையெடுப்பு

ஆணாதிக்கத்தின்
அந்த வெற்றியில்தான்
நாட்டப்பட்டிருக்க வேண்டும்
கற்பின் கொடிகம்பம்
யோனியில்

தன் இருப்பை
உணர்த்திக் கொள்வதற்காக
திடிரென்று
நியமித்துக்கொண்டிருக்கிறது
பண்பாட்டு காவலர்களை

நான் நடந்துகொள்ளவேண்டிய
விதம்பற்றி
விவரணப் படம் எடுக்கப்படுகிறது
கலை இயக்குநரால்
கலைக்காகவே
கலைஞர்களை மட்டுமே நம்பி.

இரத்தங்களை சொட்டும்
வீச்சரிவாள்கள்
அது என் யோனியின் இரத்தம்
என்பதில் பெருமிதம் கொள்கின்றன..

நாளை மருத்துவர்களின்
முயற்சியால் இப்படி கூட நடக்கலாம்
"இலவச யோனி தைப்பு முகாம்"
அன்றைக்கும் கூட சன்னமாய் தான்
ஒலிக்கப்போகிறது
உங்கள் ஆண்குறிகளை கூட
வெட்டிக் கொள்ளலாம் எனும் குரல்.

பத்தவச்ச வத்திக்குச்சி
பக்கத்திலே குளிர்காய்கிறது..
சூரியனுக்கு முன் இதெல்லாம்...
என்றபடி எழுதுகிறது
"எனது அருமை உடன்பிறப்புக்களே".

அப்பாடா
கண்ணுக்கெட்டிய தூரம்வரை
யாருமில்லை
நான் யார் என்பது
தேவையும் இல்லை.

பிரிவு

2005-12-13T13:16:00.000+05:00

மறந்திராத
stay in touch
i will miss u
இப்படி பிரிவுக்கான
எத்தனையோ வரிகளில்
ஒன்றுகூட உச்சரிக்கப்படாமல்
நிகழ்ந்துவிட்டது
நம் பிரிவு

நிதர்சனம் உடைத்த கண்ணாடியில்
முகம் பார்த்து
தன்னைத்தானே
அடையாளம் காணமுடியாமல் தவிக்கிறது
காதல்

உன் பெயரை
சப்தமில்லாமல் உரக்க அழைத்தில்
வலிக்கிறது மனது
வலியினூடே ரகசியமாய்
கேட்க நினைக்கிறது
"என் நினைவுகள் உனக்கு வருமா??"

இயல்பாய்....
பிரிந்து போனாய்
உன் நினைவுகளை விட்டுவிட்டு
பிரிவதற்கான கடைசி நேரங்களில்
என் கண்ணில் நிலைகுத்தி நின்ற
உன் பார்வை
'புரிகிறது' என்று சொன்னதாய்
புரிந்துகொள்கிறது மனது.

நீ இல்லாத போதும்
நினைவுகளில் உன் இருப்பை
கண்காணித்துக் கொண்டே இருக்கிறது
உன் கண்கள்

இன்று இல்லாவிட்டாலும்
என்றைக்காவது சொல்லிப்போ..
புரிந்து கொண்டதாய்
இல்லையென்றாலும்
தெரிந்து கொண்டதாய்
என் காதலை

- பிரேம்

தலைப்புகளில் சிக்கிக் கொள்வதில்லை உணர்ச்சிகள்

2005-10-14T10:27:00.000+05:00

"காதலைத் தான் காதலித்தேன்
காதலியை அல்ல!!!"
காதலில் தோற்றவர்களுக்கும்
காதலி கிடைக்காதவர்களுக்கும்
பிள்ளையார் சுழி
இந்த வரிகள்....!!??

இதில் நான் எந்த இடத்தில்
எல்லைக் கோடு யாருடையது?
கேட்டால் என்னவென்று சொல்வது

மிகப்பெரிய காயத்தை
யாசித்து பெற்றுக்கொண்டேன்
உன் சிறு காயத் தழும்பை
மறைப்பதற்காக..

யாருக்கும்
பிடிக்காமல் போவேன் எனத்
தெரிந்திருந்தால்!!
உதாசினப்படுத்தியிருக்க மாட்டேனடி
உன்னை!!??

என்னையும் ஒருத்திக்கு
பிடிக்கும்..!
என்பதற்கு சாட்சியாகவாவது
இருந்திருப்பாய்.

இங்கு
திரெளபதிக்கு ஆசைப்பட்டு
அர்ஜுனன் கூட
சகுனியாகிப் போனானடி!?

சேரனின் அம்புகள் கூட
பாண்டியன் திரும்பி இருக்கும்
தருணம் பார்த்தே பாய்கிறது

நன்றி கெட்டவர்களை
நினைத்து வற்றிப்போனதடி
நெஞ்சின் ஈரங்கள்

வா
உன் கூந்தலின் ஈரத்தில்
வந்து நனைத்து
விட்டுப்போ.

முதுகில் காயப்பட
இடமும் இல்லை
நெஞ்சிலோ கீறல் கூட
இல்லை

சித்திரவதைக் கூடத்தை
நானே திறந்து வைக்கிறேனடி
வந்து அணுஅணுவாக
சித்திரவதை செய்.

என் கண்ணீரின் ஈரத்தில்
உன் கோபத்தை தணித்துக்கொள்.

இது கவிதையும் அல்ல
புலம்பலும் அல்ல

இரத்தங்கள்

நினைவுகளின் தழும்புகளை
குத்திக் கொண்டதின்
விளைவுகள்

வெகு நாளைக்கு பிறகு
ஆசைப்படுகிறேனடி
முகவரி இன்றி தொலைந்து போக.

வா வந்து சொல்லிவிட்டுப்போ
உன்னை காதலிக்கிறேன் என்று.

- பிரேம்

கவிதை

2005-09-15T17:25:00.000+05:00

அழகாய் தான் இருந்தது
பிறந்த
என் குழந்தை!!
சாயல் மட்டும் வேறாக!?
திருத்தப்பட்ட எனது கவிதை

காதல் தோழி

2005-09-14T12:07:00.000+05:00

தோழியிடம் சொல்வதற்கென்ன??
தைரியமாய் சொல்லிப்போ
என்னை காதலிப்பதாய்

உன் உணர்ச்சிகளின்
வடிகால் தானே நான்
இதில்
காமத்திற்கு மட்டுமென்ன விதிவிலக்கு!!?

புரியாத இரவுக்கான எதிர்பார்ப்பில்
புரிந்து கொண்டதாக செய்யப்படும்
(திரு)மணங்களில் விருப்பமில்லை
எனக்கு
வா
புரிந்துகொள்வோம்
நம்
தேவைகளை
அறிந்து கொள்வோம்
நம் மனங்களை.

மனிதனை கொன்று
சம்பிரதாயம்
காக்கத் துடிப்பவர்களுக்கான
தண்டனையாய்
தோற்கடிப்போம்
சம்பிரதாயத்தை

(திரு)மணத்தினால் அல்லாமல்
மனத்தினால் பந்தம்
செய்து கொள்வோம்

விரும்பும் வரை

நீ உன் வீட்டிலும் நான்
என் வீட்டிலும்
தங்கிக்கொள்வோம்

உனக்குத் தேவை
என்கிறபோது
நானும்
எனக்குத் தேவை என்கிறபோது
நீயும்
சமரசம் செய்துகொள்வோம்
விருப்பு வெறுப்புகளை
தீர்த்துக் கொள்வோம்
அது இச்சையே ஆனாலும்.

நீ
எனக்காக பேசு..
பெண்ணியம் பேசு
கலவியில் கூட
வேண்டுவன கேள்
என பேசு.

மனைவி தோழியானால்
ஆச்சர்யம்
தோழி மனைவியானால்
அதிர்ஷ்டம்
சொல்லிப்போ
காதலிப்பதாய்

இப்போதும் நான் உன்
தோழி
இப்போது தான் நான்
தோழி
தைரியமாய் சொல்லிப்போ
என்னை காதலிப்பதாய்

காணாமல் போனவர் பற்றிய அறிவிப்பு

2005-09-07T16:05:00.000+05:00

யாராவது பார்த்தீர்களா?
இரண்டு நாட்களாக காணவில்லை
அவனை
அடையாளம் தானே கேட்கிறீர்கள்!!??

தனக்கான அடையாளத்தை
தேடித் தேடித்தானே
தொலைந்து போனான்
அவன்...!

வாழ்க்கையை
அவன் வாழவில்லை
அவன் வாழ்க்கையை
அவன்
வாழ்ந்ததில்லை!!!

ஒவ்வொரு முறையும்
உயிர்த்தெழுந்ததும்
எதிர்பார்ப்புகளின் சிலுவையில்
அறையப்படுகின்றன
இவன் ஆசைகள்...!

வாழலாம் என நினைத்தபோது
எதிர்பார்ப்புகள் வாழ்ந்திருந்தது
அவன்
நிகழ்காலத்தை!!??

சாவிற்கு பயப்படாத அவன்
வாழ்க்கை..
சாவதற்கு பயந்து
செத்து செத்து வாழ்ந்தது...!!

அவ்வப்போது
நிராகரிப்பும்
அலட்சியங்களும்
கருகலைப்பு செய்கின்றன
இவன் அடையாளங்களை...!!

கருகலைப்பு செய்யப்பட்டதில்
வழிந்த இரத்தத்தை
தானே துடைத்துக் கொண்டிருப்பான்
மெளனம் கொண்டு!!!
யாராவது பார்த்தால் சொல்லுங்களேன்.

- பிரேம்

கைக்குட்டை

2005-08-12T10:01:00.000+05:00

கைக்குட்டை

உன்
வியர்வையில் குளித்ததை
அழுக்காக்கி விடாதே!!
துவைத்து...

கி.பிரேம்குமார்

இருட்டு

2005-08-12T09:57:00.000+05:00

இருட்டு

என் செல்வமே...
வீட்டை விட்டு வந்தேனடி
விடிவு காண அன்று !
என் வாழ்க்கை விடிவதே
இரவில் தானடி !!

எவ்வாறு நெஞ்சில் ஈரமிருக்கும்
மனிதமிருகங்களுக்கு,
கொடுத்த பிறகு கொடுத்தார்கள்
உணவெனக்கு !

ஆம்!
என்னையே கொடுத்தபிறகு
கொடுத்தார்கள் உணவெனக்கு !!

நானும் ஒரு மனிதப்பிறவி தானடி
அந்த மரியாதை கூட எனக்கு
தர மறுப்பதேனடி !!

சந்தையிலே தீண்டத்தகாதவள் போல்
பொருளைத் தூக்கி எறிந்தானடி,
நேற்று என்னைத் தீண்டும் போது மட்டும்
அந்த எண்ணத்தைத் துறந்துவிட்டானடி !

என் இருட்டறையில் வளர்கின்ற
என் செல்வமே !
எந்த எழுத்தை இடுவேன் உன்
பெயருக்கு முன்னமே?
காந்தி நோட்டைப் பார்த்ததும்
நிம்மதியடைந்தேன்|
உன் அப்பன் பெயர் என்னவென்று
கேட்க மறந்தேன்.

நீ பிறப்பதற்கு முன்னமே
தெரிந்து கொண்டேன் செல்வமே !
நீயும் நானும் ஒன்றென்று.
நம் வாழ்வு இருட்டில்
தான் முடியுமென்று !!

பாவம் பெண்ணே நீ !
உனக்குத் தெரிந்திருக்க
வாய்ப்பில்லை
என் கருவறையில் உனக்குக்
கருமாதி நடக்குமென்று !!

மன்னித்துவிடு என் செல்வமே
வயிற்றை நான்
கழுவிக்கொள்கிறேன்.
இல்லையெனில்
என் வயிற்றைக் கழுவுவது கடினமடி.

நீ கொடுத்து வைத்தவள்
என் கண்ணே !
மூன்று மாதம் தானடி
உன் வாழ்வு இருட்டில்
வாழ்வே எனக்கு இருட்டில்தானடி !!

- பிரேம் குமார்.கி

ஊமையாய் நான்.....

2005-08-12T09:52:00.000+05:00

ஊமையாய் நான்.....

தோட்டத்துல மல்லிப்பூ பூத்திருந்தும்
தொடுத்து வைக்க முடியலயே!
வாழத்தடையில பூ தொடுப்பாக பார்த்திருக்கேன்
உன் உசிருல தொடுத்ததேன்னு தெரியலையே!

புற்றுநோய் எனத் தெரிந்திருந்தும்
பொட்டு வச்சு போனவனே
வியர்வையில குளிக்கையில் தெரியாமல்
போனதய்யா
கண்ணீரில் நீ நீந்தவைப்பன்னு.

கல்யாணச் சிரிப்பு அடங்குமுன்னே
சந்திசிரிச்சி போனதய்யா என் வாழ்க்க
பந்திக்கு இல போடுமுன்னே
பந்தி முடிஞ்சதேன்னு புரியலையே!

மஞ்சக் கயத்தில என் வாழ்க்கையை
தூக்கிலிட்டுப் போனவனே!
உயிர் போன பின்பு ஒப்பாரி வச்சவுக,
நீ போன காரணம் தெரிஞ்சிருந்தும்
நான் வந்த நேரமுன்னு சொல்லி
உயிரோட எரிக்கிறாக என்னை.

முழுகாம நான் இருக்குமுன்னே
மூழ்கிப் போனதய்யா என் வாழ்க்கை
கல்யாணத்துக்கு கட்டின வாழையின்னும்
கருகலையே!
என் வாழ்க்கை பட்டுப்போனதேன்னு
தெரியலையே

கைக்குள்ள அடங்காத உன் உடம்பு
சட்டிக்குள்ள அடங்கிப்போன மர்மமென்ன?
ஏத்திவச்ச குத்துவிளக்கு அணையலையே!
கொள்ளிக்கட்டைக்கு நெருப்பானதேன்னு
புரியலையே

பொட்டு வாங்க வச்சிருந்த ஒத்த ரூபா
பொட்டாகிப் போனதடா உன் நெத்தியில
கட்டியிருந்த சேல முழுசா கசங்கலையே!
'கோடி' சேலைக்கு என்ன அவசரமுன்னு தெரியலையே!

என் வாழ்க்க சின்னாபின்னமானதடா
உன் மரணச் சின்னமாகிப் போனேனடா
நடமாடும் கல்லறையாகிப் போனதாலோ என்னவோ
சொல்ல முடியாமல் ஊமையாகிப் போனேனடா!

கி.பிரேம் குமார்

கவிதையும் போராட்டமும்

2005-07-27T20:13:00.000+05:00

நிராகரித்து விடுங்கள்
என் கவிதையை
அழக்கூட முடியாத
ஆற்றாமையின் வெளிப்பாடுதானே
அது!!??

கவிதை மட்டும்தான்
காயப்பட்டுப் போகிறது
என் கண்ணீரின்
ஈரத்தில்....

அதன் காயங்கள்
சொல்லிப்போகும்
நிராகரிப்பின்
வேதனையை

கவிதையும் போராட்டமும்
ஒன்றுதான்
போராடுபவர்களுக்கு
புரியும்
அதன் நியாய அநியாயங்கள்

"வந்தால் மலை போனால்
மயிர்"
என்று சொல்வதற்கு
பணயம் வைக்கப்படுவது
மயிர் அல்ல
உயிர்

அதுசரி
அடுத்தவன் உயிர்
உங்களுக்கு மயிர் தானே!!

பாவம் நீங்கள் என்ன செய்வீர்கள்
மனிதனாக பிறந்தது
உங்கள் குற்றமா என்ன???

ஒடித்துப்போடுங்கள்
உங்கள் தராசின் முட்களை

போதையில் ஆடும் அதன்
ஆட்டத்தின் முடிவை
எதிர்பார்த்தில்லை
போராட்டமும்
என் கவிதையும்.

என் தோழிக்கு சமர்ப்பணம்

2005-07-27T20:10:00.000+05:00

கூட்டத்தில் தள்ளி நின்று
தேடுகிறது காதல்
தேடி அலைகிறது நட்பு!!

உன் செல்பேசியின்
மௌனம்
உரக்கச் சொல்லிப்போகிறது!!??
என் அருகாமை
உனக்குத் தேவை என்பதை..

"டேய் எப்படிடா இருக்க"
என்ற வார்த்தைகளின்
இடைவெளி
உணர்த்திப்போகிறது...!!!
நீ என் அழைப்புக்காக
காத்திருந்த நேரத்தை...

"வழியிறான்"
என்று சொல்லாமல்
எத்தனை முறை தவிர்த்தாயோ??
என்னை யாரும் சொல்லிவிடுவார்கள்
என்ற பயத்தில்!!

"நட்புக்காலம்"
வாசித்த பிறகுதான் புரிந்தது
கவனிக்கப்படுகிறோம் நாம்...!!??
நம்மை அறியாமலே..!!!

உனக்கு உணர்த்தப்பட்டபிறகே
தெரிவிக்கப்படுகின்றன
என் கஷ்டங்கள்
நம் நண்பர்களுக்கு!!??

யோசித்திருக்கிறாயா
ஏனென்று??

இனக்கவர்ச்சி என்று
சொல்லிவிட்டு போகலாம்
மற்றவர்கள்

ஆனாலும்
நிறப்பாமலே விட்டுவிடுவோம்
இதற்கான பதிலை!!!

கண்டுபிடித்து விடாமலா
போகப்போகிறார்கள்
தாயிடம் மகனும்
தந்தையிடம் மகளும்
ஒன்றிப்போவது
ஏன் என்று!!

அன்றைக்கு
எழுதிக்கொள்வார்கள்
அவர்களாகவே

எனக்கு பிடித்ததை
அணியச் சொல்கிறது
காதல்
உனக்கெது நன்றாக இருக்கும்
என்று
பார்த்து பார்த்து தேர்ந்தெடுக்கிறது
நட்பு ...!!

(தொடரும்....)

தொடர்ந்து கொண்டுதான்
இருக்கும்
உனக்கான என் கவிதையும்.....
நட்பும்....

-பிரேம் குமார்

யார்....? யாருக்காக....!!???

2005-07-27T19:58:00.000+05:00

ஏன்
எதற்கு
எப்படி
என்று கேட்டுக்கொண்டே போகலாம்!!
இருந்தாலும் தெளிவாக சொல்லமுடிந்ததில்லை
நம் பிரிவுக்கான காரணத்தை!!!

பல நாட்களாக கண்ணீர் பட்டும்
கரையாமலே இருந்தது
எதிர்பார்ப்புகளினால் ஏற்பட்ட
ஏமாற்றத்தின் கசப்பு....!!!

சந்தோசமோ
துக்கமோ
கவிதையாகவே பார்த்திருக்கின்றன
என் இரவுகள்,
கண்ணீரை.

அன்றைக்கு உனக்காக!!
நீ பார்த்த துளிகள்,
கரையாகவே படிந்துபோனது
என் மனதில்!!

கற்பனைக் கற்கள்,
எதிர்பார்ப்புகளோடு
நட்பையும்
உடைத்துப் போனதை
என்னவென்று சொல்வது!!??

உடைந்த பிம்பங்கள்
உணர்த்திப் போகும்
கண்ணாடிகள் உடைந்துபோனதை
அதைப் போலத்தான்
என் மெளனமும்...!!!

பட்டகாயத்தின் வடுக்களை
பார்க்கமுடியாமல்
முகமுடியே
முகமாகிப்போனது!!!

நீ வாழ்த்து சொல்லியபோது
முகத்தை திருப்பிக் கொண்டிருக்கலாம்
முகம் பார்க்கும் ஆசை
என்னையும் மீறி
என்னையறியாமல் வெளிப்பட்டுப்போகிறது!!

கண்டும்காணாமல் போவதும்
கேட்குமெனத் தெரிந்தே
கோபமாகப் பேசுவதும்
உன் பிரிவின் காயத்தை
மறைக்கத்தானே!!!

இது
கவிதையாகவே இருக்கட்டும்
இல்லை என்றாலும்

கேட்காதீர்கள்
யார்
யாருக்காக எழுதியதென்று!!!??